بغداد.....تسمحيلي

بغداد.... تسمحيلي

ما ادري اتغزل بيج

ما ادري اواسيج

ما ادري بحركَة ابجيج

ليش باعيني

مو جنتي حلوة الحلوات

ضحكتج متفارك شفاج

متحملة وصابره عالنوايب

تاليها اول الدنيا تصيرين خرايب

ليش ياعيني

وين الهيبة... وين الطيبة

وين ناسج

وين غيرة الحبيب عالحبيبة

وين الغيره

وين طبع الناس الحلو الماشفت مثله بأي ديره

وين الهوى العذب

اللي يمر الصوبين بكل درب

وين ضحكة الاطفال

اندفنت الضحكات والامال

وين السماح

ليش كل طبع حلو بهالبلد راح

وين حتى الطير هاجر

ظل بنص سماج حاير

ما ادري اصبر نفسي ما ادري اصبرج

شوكت يامحنة حنعبرج

بغداد أسألج؟

تريدن بعد نصبر

نصبر والله ليوم الدين من اجلج

انتي مو بس وطن

انتي ام واب واخ واخت واولاد وحبيب وحبيبه

انتي ارض مزروعة بالطيبة

بغداد ساعدينا

بغداد افهمينا

بغداد صدكينا

كلمن غاب عن عينج ورحل

مجبور كسرته الايام

فقد اقرب الناس

واغلى الاحباب

وجبره تعس الزمان وقرر يتركج

بس صدكي كلمن عافج قلبه ينزف دم ودمع

فراكج مو هين

يابغداد

اصحي

ارجعي لمينة

وبين احضانج ضمينة

وعلى طيب ترابج رجعينة

بغداد

ربج كريم

رؤوف رحيم

بغداد اودعج

يارب نهارج آمن

ليلج آمن

دعوة مخلصة من الطيبين

اللي حاطيج بوسط العين

لأحبابج ترجعين

عزيزة مقرورة العين

يارحمن يارحيم

ياحافظ يا أمين

كلماااات في غاية الروعة

عاشت ايدك

وين اكو احلى من بغداد بلدنيا

وشكرا

تحياتي

كلام حلو والله وعاشت ايدك

الله عالكلمات الروعه ياليت لو لكان نفدي نفسنا لبغداد وانشالله حلم الكل يتحقق وينلم شملنا ببغداد من جديد
سلامي

مشكورين حبايب على المرور الجميل او اكيد ماكطو احلى من بغداد او يارب نرجع كولنا نجمع ابغداد او تحيــــاتي

عاشت ايدك

عاشت ايدك